今日係星期六,我無去街,因為條頸仲未好得番哂,但係已經比之前好好多,好想係到多謝0的朋友仔致電關心,呢幾日,收到你地既電話,真係好開心,呢種比人問候 (即係關心) 既感覺,好似失去左好耐,近呢一年,我發覺自己好似同朋友仔斷絕哂聯絡咁,又無咩點見面,我以為你地會怪我忘記我,雖然我知道你地一直都有睇我日記,起碼知道我仍然生存係呢個世上,但係原來當我有事既時候,你地係會擔心我,會打電話問下我有無事,呢種感覺,我真係覺得好窩心!
我認為今世能夠成為一個人,係一種幸福,但係人生活得係咪有意義,係靠自己;我認為食幾多著幾多係整定,但係命運係可以靠自己改變;我又認為做朋友係要講緣份,但係好多野係要靠雙方面去努力維繫...總括以上既說話,其實大部分既野,都係應該靠自己!
眼見每日既新聞發生既意外,真係令我好無奈,因為無人可以預知自己既生命幾時會結束,所以好多人都喜歡及時行樂,因為呢種人覺得今日唔知聽日事,預計唔到下一秒會發生咩野事...日子一日一日咁過,人一天一天咁長大,身邊既事亦都改變左好多,我慶幸認識到你地,成為我一生既朋友,人生要珍惜既野其實唔咪好多,好多野錯過左,你就會後悔....
因為你地既一句說話一個問候,我開心左成日,時下既人好少會主動去關心人,覺得講0的關心說話係好肉麻,其實我一0的都唔覺得,要知道你短短既三分鐘電話,只要係你親口既說話,可能已經能夠令到對方感動到不得了,我唔知其他人係咪咁諗,但至少我一定係咁諗,所以...朋友仔,我好多謝你地既關心! 楚楚同車車,我特別要係呢到誠意咁多謝你地!
Chatboard (0)